සුජීව අමරසේනගේ මිලිටරි පාලනයට එරෙහිව රුහුණේ ආදි සිසුන් හඬ අවධි කරයි!
පසුගිය වසර තුනක පමණ කාලයක සිට රුහුණ විශ්වවිද්‍යාලය තුළ උපකුලපති සුජීව අමරසේන උපකුලපතිවරයා විසින් ගෙන යනු ලබන අත්තනෝමතික ප්‍රජාතන්ත්‍ර විරෝධී මිලිටරිමය පරිපාලන ආකෘතිය සහ උපකුලපති නිළවරණය සමඟ විශ්වවිද්‍යාලය තුල උද්ගත වී ඇති අර්බුදකාරී තත්වය සම්බන්ඳව රුහුණ විශ්වවිද්‍යාලයේ ආදිවිද්‍යාර්ථයින් විසින් අද දින (07) මාධ්‍ය සාකච්ඡාවක් පවත්වනු ලැබීය.
සුජීව අමරසේන මහතා රුහුණ විශ්වවිද්‍යාලයේ උපකුලපති ධුරයට පත්වී මේ වන විට වසර තුනකට ආසන්න වෙමින් ඇත.එම වසර තුනකට ආසන්න කාලය තුළ ඔහු විසින් සුවිශාල ප්‍රජාතන්ත්‍ර විරෝධී මර්දන යාන්ත්‍රණයක් ක්‍රියාත්මක කරන ලදී. ශිෂ්‍යයන්ට පමණක් නොව ආචාර්යවරුන් සහ අනධ්‍යයන සේවකයන්ටද අත්තනෝමතිකත්වයට මුහුණදීමට මේ වනවිට සිදුව ඇත. විරුද්ධ මත දැඩි ලෙස මර්දනය කළ ඔහු තම ඕනෑම අදහසකට එකඟවන එහෙයියන් පිරිසක් සමග පමණක් එකතුව විශ්වවිද්‍යාල පරිපාලනය ගෙනයමින් ඇත. වත්මන් නියෝජ්‍ය උපකුලපතිවරයා සහ විනය පාලක වරයා උපකුලපතිවරයාගේ පදයට නටන රූකඩ පරිපාලකයන් ලෙස පෙරමුණෙනම සිටී. මෙවැනි තත්වයක් තුළ විශ්වවිද්‍යාල ප්‍රජාව ලෙස සිසුන්, ආචාර්යවරුන්,අනධ්‍යන සේවකයන් අතර දැවැන්ත විරෝධයක් සුජීව අමරසේන උපකුලපතිවරයාගේ පරිපාලනයට එරෙහිව ගොඩනැගී ඇත.
එහිදී ඔවුන් සදහන් කර සිටියේ "විශ්වවිද්‍යාලයක් තුල නිදහසේ ඉගනීමට හැකි එය සියලු ජන ප්‍රජාවන් ට විවෘත,ඉබි යතුරු දමා වසා නැති භූමියක් බවට රුහුණ පත් විය යුතු බවයි. විද්‍යාලයාලය තුළ අධ්‍යයන නිදහස මෙන්ම දේශන ශාලාවෙන් බැහැරව සිදුකරන ක්‍රියාකාරකම් සඳහා ද නිදහස තිබිය යුතුය. එසේම සංවිධානය වීමේ සහ අදහස් ප්‍රකාශ කිරීමේ නිදහස විශ්වවිද්‍යාලය තුළ තිබිය යුතුය."විශ්වවිද්‍යාලය"යන වචනයට සැබැවින්ම සැබැවින්ම එහි අර්ථය එකතු වන්නේ එවිටයි. සමාජ විරෝධී සහ සදාචාර විරෝධී නොවන ක්‍රියාවන් සඳහා විශ්වවිද්‍යාලය තුළ සීමා පැනවෙන්නේ නම් එය විශ්වවිද්‍යාල අධ්‍යාපනය මොට කිරීමක් ලෙස දකිමු. විශ්වවිද්‍යාල පාලකයන්ට අවශ්‍යය වන්දිභට්ටයින් තනන අවකාශයක් වන්නේ නම් අප සමාජයක් ලෙස තවදුරටත් ඛේදවාචකයටම තල්ලු වීම වළකා ලිය නොහැක. කණගාටුවට කරුණ වන්නේ රුහුණ විශ්වවිද්‍යාලය තුළ එවැනි විචාරශීලී සබුද්ධික ශිෂ්‍ය ප්‍රජාවක් බිහි වීමට ඇති ඉඩකඩ අවුරා දමමින් තිබීමයි. ඒ සඳහා සුජීව අමරසේන උපකුලපතිවරයා ඇතුළු පිරිස ගත හැකි සියලුම නන්විද උත්සාහයන් ගනිමින් ඇත.
විශ්වවිද්‍යාලය තුළ සිසුන් ඒකරාශි වන ස්වාධීන සිසු ක්‍රියාකාරකම් තහනම් කර ඇත. සාමූහික අධ්‍යයන කටයුතු (කුප්පි) සිදු කිරීම පවා තහනම්ය. හැඳුනුම්පත පෙන්වා ගේට්ටුවෙන් ඇතුල් වී සවස හයෙන් පසුව විශ්වවිද්‍යාලයෙන් ඉවත් විය යුතුය. දේශන නොමැති විට විශ්වවිද්‍යාලය තුළ සිටීමද දඬුවම් ලැබිය හැකි වරදක් වනු ඇත. සිසුන් නේවාසිකාගරයට සවස හය වනවිට වාර්තා කළ යුතුය. නේවාසිකාගාර වල පවා සීසීටීවී කැමරා සවි කර ඇත්තේ ශබ්ද පටිගත කිරීමේ තාක්ෂණයද සමඟය. විශ්ව විද්‍යාලය තුල ද සීසීටීවී කැමරා සවි කර ඇත. බැනර් හෝ පෝස්ටර් විශ්වවිද්‍යාලය තුළ ප්‍රදර්ශනය කර අදහස් ප්‍රකාශ කිරීම තහනම්ය. එසේම විශ්වවිද්‍යාල තුල පවතින ඇතැම් පසුගාමී සංස්කෘතිකාංග පලිහක් ලෙස ගෙන සිසුන් මර්දනය සඳහා කටයුතු කිරීම සුජීව අමරසේන උපකුලපතිවරයාගේ සැලසුම වී ඇත. මෙම මර්දන කාරි වැඩපිලිවෙලට ආදිවිද්‍යාර්තයින් ලෙස එරෙහි වන බවත් ඊට එරෙහිව ඉදිරි ක්‍රියාමාර්ග ගන්නා බවද ඔවුන් තවදුරටත් සදහන් කර සිටියහ.
No comments:
Post a Comment