වත්තල හේකිත්ත ක්‍රිස්තුරාජ විදුහලේ ඉඩම හා ගොඩනැගිලි නිදහස් කරගැනීමට පෙළ ගැසෙමු!
වත්තල හේකිත්ත ක්‍රිස්තුරාජ මහා විද්‍යාලයේ ප්‍රාථමික අංශයට අයත් ඉඩම හා ගොඩනැගිලි සිංහ සමාජය විසින් බලහත්කාරීව අත්පත් කරගෙන තිබේ. එම සම්පූර්ණ ඉඩම් ප්‍රමාණය පර්චස් 94.3කි. පාසලට ඉතිරි වී ඇති ඉඩම ප්‍රමාණයෙන් පර්චස් 16ක් පමණි. හේකිත්ත, අල්විස්වත්ත, පල්ලියවත්ත, ලංසියවත්ත, කුරුඳුහේන, ඇතුළු ගම් ප්‍රදේශ ගණනාවකට අයත් දරුවන් 300 කට ආසන්න ප්‍රමාණයක් පාසලේ ඉගෙනුම ලබයි.
වසර දහයක් තිස්සේ පාසලේ ගුරුවරුන් දෙමව්පියන්, ආදි ශිෂ්‍යයින් සහ ප්‍රදේශවාසීන් පාසලට අයත් ගොඩනැගිලි හා ඉඩම නැවත ලබා දෙන ලෙස ඉල්ලීම් කළත් සිංහ සමාජය එයට ඇහුම්කම් දෙන්නේ නැත. ව්‍යාජ ලිපි ලේඛන ඉදිරිපත් කරමින් පාසලේ දේපල තමන්ට පවරාගැනීමේ උත්සාහයක ඔවුන් නිරත වෙයි.
මේ පිළිබඳව පාසල විසින් නඩුවක් ගොනු කළ අතර එහිදී ද නැවත ඉඩම් සහ ගොඩනැගිලි පාසලට ලබා දිය යුතු බව තීන්දු කෙරිණි. නඩු තීන්දුවක් තිබියදීත් සිංහ සමාජය විසින් පාසලේ ඉඩම් තවදුරටත් සිය සන්තකයේ තබාගෙන සිටියි. මෙයට එරෙහිව දෙසැම්බර් 21 දින දෙමව්පියන් විසින් උද්ඝෝෂණයක් ද පැවැත්වූ අතර ආරංචි මාර්ග අනුව තමන්ට අයත් ඉඩමකට බලහත්කාරීව ඇතුළත් වූ බව කියමින් සිංහ සමාජය වත්තල පොලීසියට පැමිණිල්ලක් සිදු කර තිබේ.
දෙමාපියන්, ගුරුවරුන් හා ප්‍රදේශවාසීන් ගෙන යන අරගලයට නිදහස් අධ්‍යාපනය උදෙසා සිසුජන ව්‍යාපාරයේ සහයෝගය ද හිමිව තිබේ.
No comments:
Post a Comment